衣不稱身之“科學化決策” 林 喜

衣不稱身之“科學化決策”

林 喜
衣不稱身之“科學化決策”

林樂要“短打”，林喜求之不得，但要先將基本概念搞清楚：林喜絕非“唔同意大劇院係本地劇社演出選擇”，而係覺得“本地劇社好難Handle喺大劇院做兩場或以上（咁嘅規模或格局）嘅演出”。強調節奏同能量嘅喜鬧劇《禧春酒店》就唔適合大館——中小型演出格局嘅戲，走去大場做（林喜覺得舞台設計本可就下，但可惜冇）一定功倍事半，情況一如明明係籃球賽卻走去足球場打，班球員又唔係NBA或國家隊，你話會有幾好睇？

林樂話只要藝術上做相應調整，就可以拎個黑盒劇場去綜合劇院做，但林喜卻要問句“點解先”？點解黑盒劇場唔喺小劇場做，要拎去綜合劇院？係藝團自己決定無嘢講，但淨係因為無小劇場用，咁咪係“削足就履”？所以林樂話係“谷”同“縮”，林喜唔同意，套句家陣流行嘅官腔：係“科學化決策”嘅問題。講開“衣不稱身”，就用“衣”來比喩：阿爸願豪使幾萬蚊幫阿仔買衫，唔代表買件阿媽尼畀個仔佢就開心啩！或者佢想買件着得舒服嘅運動衫去打波呢？澳門嘅現實就係中小製作為主，目前最缺乏中、小型專業演出場地，大家都唔想日日走去爭文化中心啩！但實情係無得揀——爭唔到細館，大館都只好照殺，但求有得做先算。至於林樂建議藝團揀戲時預先考慮埋喺大劇院度演，對專業程度、規模格局都尙未成氣候嘅本土藝團來講，又會否帶來“揠苗助長”嘅副作用？

林 喜