澳門文學節之“有名無實” 林 喜

澳門文學節之“有名無實”

林 喜
澳門文學節之“有名無實”

上篇林樂提到華文戲劇節嘅（外地）演出同場地嘅錯配，知名藝評人周凡夫喺上周的專欄文章提及一些資料，値得參考。據周透露，原來今次台灣原計劃參節嘅開幕演出係大型音樂劇《渭水春風》（當地各大報章上甚至都已廣泛報道），但最後因撥款不足未能成行，臨時由《K24》頂上。或者咁可以解釋點解小劇場之作《K24》“夾硬”落文化中心大館，造成衣不稱身嘅效果。雖然呢樣嘢同澳門組委會無關，但由此可見，舉辦此類藝文節慶活動，構思幾正都好，落到實際操作層面，難免有各種意想唔到嘅出入，有時睇上去嘅“小問題”，可能會影響到成個活動嘅成敗。講開呢樣，不由想到早前悄無聲息開幕閉幕嘅“澳門文學節”。

本地葡文報章慶賀創刋，唔登廣吿，亦唔擺酒，卻舉辦咗澳門史上破天荒首次嘅“澳門文學節”，林喜覺得値得大力鼓掌。可惜，活動名頭雖響，但組織卻馬虎隨便，比如大多活動時間安排喺返工返學時段，直頭趕客，有心出席者如林喜根本去唔到，其次，活動資訊混亂、宣傳不足，去唔到嘅人亦無辦法透過其他渠道知悉相關情況。而最搞笑嘅，就係打正“澳門文學節”嘅文學活動，結果從官方網站到大會場刋，中文錯別字連篇，被外地作家們睇到，可能會覺得澳門文學原來如此“水皮”，個個笑甩大牙。

林 喜