澳門文學節之不食人間煙火 林 樂

澳門文學節之不食人間煙火

林 樂
澳門文學節之不食人間煙火

一時之間，澳門小城充滿文學氣息，華文戲劇節、中篇小說奬、澳門文學奬、二○一○年澳門文學作品選、首屆澳門文學節接踵而來。驟聽起來，喜歡文學嘅朋友應該不愁寂寞。但細心一稔，如果純係喜歡閱讀而又唔擅於執筆寫作嘅朋友，上述一連串活動，似乎得個“睇”字，而其中有啲作品仲係“睇”都冇得“睇”。林樂睇到新書發佈消息，稔住先睹為快，於是走去熱賣本地出版物嘅書店買書，點知問咗幾次都未有得買。

上述連串活動之中，最適合一般喜歡文學嘅市民參與嘅，應該係首屆澳門文學節。點知林樂一睇成份節目表，心儀嘅作家除咗香港嘅素細之外，蘇童、安妮寳貝同陳玉慧嘅作品介紹會都放喺辦公時間舉行。可能個文學節祗係預職業作家參加，冇預一般市民參與啩。限於工作，林樂祗可以出席其中一項活動，而果然一如所料，可以抽空出席嗰個活動嘅市民唔多。主辦機構個網站嘅活動資料不足，好似素細大師班究竟內容係乜，一啲都冇介紹過。

首屆澳門文學節旣然由葡文報章舉辦咗，唔知會唔會有註冊專屬，即係話，以後都要由同一機構續辦？其他社團組織、甚至政府可唔可以接辦第二屆呢？抑或要另起爐竈，另改一個名？而以後嘅澳門文學節都由唔熟識澳門華人民情嘅葡語機構舉辦，結果會唔會又係呢屆咁，佢有佢搞，不食人間煙火？

林 樂