成年人迷打機有後遺症

成年人迷打機有後遺症

賈大廚

成年人迷打機有後遺症

日前睇報紙，發現一項與澳門人息息相關的研究調查報告，內容指出愛打機的男性成年人較易致肥，若然是女士沉迷的話，更有可能患上抑鬱症，都咪話唔得人驚。

據報道，該項研究由美國疾控中心，以及兩所大學共同合作進行，具有肯定的權威性。調查主要是尋找成年人打機與健康風險的關係，結果顯示，女機迷較沒有接觸遊戲機的女士更容易患上情緒病，尤其是抑鬱症，而且健康狀況亦相對較差。雖然調查發現，打機對男士的影響不及女性嚴重，但肯定會越打越肥，越積越多脂肪，增加患上心臟病、糖尿病的風險。

唔想中年發福，都係快啲搣甩鋪打機癮，就算真係戒唔到、心思思，亦唔好全天候沉迷，話晒都係成年人，應該有自制能力。雖然調查對象針對係成年人，咁唔代表青少年、細路仔就可以放肆，任得自己墮落在互聯網、電視遊戲的虛擬世界之中。

今年暑假流流長，相信終日沉迷打機的人都唔少，問心有幾多時間會攞去做吓運動，有諗過都已經抵讚。後生唔係免死金牌，已經有研究報告講明沉迷打機會影響健康、甚至社交生活，仲唔識得懸崖勒馬，日後至醒覺或後悔，可能已經太遲。

賈大廚